मैत्रीचे लोणचे
आपली मैत्री
मुरलेले लोणचं!
मनात येइल तेव्हा
कसंही चाखायचं.
लहान फोड , मोठी फोड ,
अख्खं किंवा केले किसून .
त्याच्या चवीला नाही तोड,
सर्व ऋतुत जाते मन जिंकून.
लोणच्याचे आहे विविध प्रकार ,
बरण्यांचे ही वेधक रेखीव आकार.
स्वाद नाना आंबट, गोड, तिखट,
खाताना होतात सर्वंच हावरट.
मिरचीचे लोणचे तिखट जहाल
जास्त खाल्यास होतात हाल.
दुरूनच हालहवाल विचारावा,
लिंबाचा आधार अशावेळी घ्यावा.
कैरीचे लोणचे मस्त चटकदार
कोणत्याही प्रसंगी आणते बहार.
मुरलेल्या लोणच्याची लज्जत न्यारी,
दिवसेंदिवस वाढते त्याची खुमारी.
मुरलेल्या मैत्रीत चव लोणच्याची
कैरी, आवळा, लिंबू, किंवा मिरची.
आवडेल त्याचा मनसोक्त स्वाद घ्यावा,
प्रसंगानुरूप लोणच्याचा प्रकार बदलवावा.
आमची मैत्री मुरलेले लोणचं मस्त
सर्वच आवडीने करतात मजेत फस्त.
मसाल्याचे स्वरूप बदलते थोडेफार
चाखण्यास चव आम्ही सदा तयार .
त्याच्या आठवणीनेच भूक लागते
कोणत्याही प्रसंगाची लज्जत वाढते.
नुसत्या सयीनेच मन ललचावते
प्रत्यक्ष मिळाल्यास, अहाहा , मन खुलते.
मी आहे खरेच किती बरे भाग्यवान
मनाचा कल बदलणारे मित्र मिळाले छान.
आमच्या मैत्रीचे लोणचे चटकदार
खूप मुरल्याने आता झालंय जास्त मजेदार.
वंदना पाठक
